昔日東方政情：為預算案獻計 羅庭德送爆谷
政府日前開始就2022至23年度《財政預算案》展開公眾諮詢，從不同渠道聽取意見，而北區區議會主席羅庭德會面財政司司長陳茂波嘅時候，就送咗一桶親手研製同生產嘅爆谷，話希望政府扶持中小企業、檢視及寬限各類牌照申請手續同成本，降低年輕人創業門檻，同埋解決水貨客嘅問題喎。
盼鼓勵年輕人創業
話說羅庭德喺上年嘅諮詢會就送咗本地種植嘅蔬菜畀財爺，今年就搞搞新意思，改送佢自己親手製作嘅爆谷。羅形容，北區有困擾多年嘅水貨問題，令社區失去多元發展、零售貨品選擇單一，認為應對水貨問題嘅關鍵，係政府要喺北區打造新興產業、鼓勵年輕人創業，先可以令水貨客摒棄搵快錢心態，重新投入勞動市場。
其實諮詢會仲有約見分區委員會等地區組織，聽聞都有人希望政府派錢、派多輪電子消費券，亦有人強調要改善公營醫院嘅輪候情況同埋扶持青年社企。但疫情下香港經濟仍未復甦，唔知政府今次又有乜嘢新辦法，協助社會共渡難關呢？
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
