政情：憶7蚊擦聖誕大餐 李家仁嘆銀紙縮水

李家仁話呢份餐單約莫係60年前，當時較平民化嘅餐廳，一客聖誕大餐約莫係5蚊左右，收得7蚊已經係知名食府啦。佢話對比今日，舊時嘅聖誕大餐確有其特色，譬如並無前菜主菜之分，菜式琳琅滿目但分量唔多，而牛油餐包則通常排得較後。雖然時下嘅聖誕大餐菜式好難同昔日比較，但貨幣嘅購買力亦都今非昔比啊！令人無奈嘅係，銀紙縮水實屬必然，金錢如何保值實在係一項難題。

李家仁又慨嘆，憑儲蓄以達成目標嘅做法已未必管用。儘管買股票係投資嘅常用手段，但佢認為股票升跌背後牽涉太多因數，一般人難以參透更遑論從中獲利；反而從過往紀錄嚟睇，黃金抵禦通脹嘅能力較高，不過購入黃金之後，如何安全保管實在又傷腦筋咁話。