政情：失議席趙柱幫 呻窮到交唔起稅

沙田前區議員趙柱幫，尋日平安夜就收到薪俸稅繳納通知書，總額高達4萬幾元嘅應課稅款嚇佢一跳，又指自己已經冇咗區議員份糧，無理由要繳交咁多暫繳稅喎。

從上載到社交平台嘅稅單可見，趙柱幫經稅務局評稅後，佢總共要繳交薪俸稅47,414元，而暫繳稅就佔咗34,161元。儘管趙今年7月辭去區議員職務後，轉行從事地產代理，但佢話自己已經唔係區議員啦，仲邊度有咁高收入呢？無理由用番區議員收入嚟計數囉。

佢又話好窮，無錢交稅，無錢還畀政府，仲鬧爆稅務局係吸血鬼添。之不過有網民好冷靜咁講，對評稅結果唔滿意嘅話，係可以去信稅務局，有得傾o架。