政情：參選被批搞搞震 莫錦貴話良性競爭

話說前日鄉議局會議甫開始，成功連任嘅劉業強率先發言，感謝投票支持佢嘅委員，又話今次係該功能界別成立以嚟第一次選舉，話要多謝對手莫錦貴，形容兩人喺競選期間係君子之爭，打出高質素選戰。喺接受訪問後，劉更拉埋莫影相，睇嚟兩人感情並無因為選舉而受影響喎。

被問到選舉過後有咩感受，曾兩次參選立法會選舉嘅莫就話，喺選舉開始時已表態支持劉，但今次因認為新選舉制度饒有興味，先至會有興趣想試下參選，坦言早已評估勝算較微，所以未有因為落敗而心情唔好。

莫又笑指雖然參選期間被兄弟批評搞搞震，但強調鄉議局關係融洽，仲大讚劉器量大，與對方亦係良性競爭，並無惡言相向同有講有笑啊。