政情：70歲新丁遊立會感覺似開學

臨時辦公室私隱度低? 梁君彥話冇問題

多位候任議員將會係來屆議會嘅「新丁」，立法會尋日就為候任議員舉行兩場「導賞團」，向佢哋介紹立法會設施及中信大廈臨時辦公室。有年屆70歲嘅候任議員形容自己係「長者新丁」，感覺如準備開學嘅同學，亦有議員唔滿意臨時辦公室欠間隔，擔心工作保密問題。另外，據了解使用中信大廈辦公室嘅議員唔可以處理申訴及召開記者會，睇嚟都幾唔方便喎。

參觀前，地產及建造界候任議員龍漢標就話「心情如新生入學，睇吓啲班房、睇吓啲圖書館」又話「有啲新鮮感」。至於會否有意加入事務小組委員會，佢就話暫時未有決定。尋日參與介紹會嘅候任議員，一行人先參觀一樓嘅會議廳。可能因屢有議員被影到開會唔專心，主席梁君彥形容會議廳如「金魚缸」，話記者會喺攝影房中捕捉議員一舉一動。社會福利界候任議員狄志遠就問，點解會議廳嘅區徽換咗國徽？梁君彥隨即寸爆佢，話狄「無睇報紙」喎。

狄志遠談羅致光「前黨友已不是價值」

立法會大樓因議席增加而擴建，因此租用中信大廈部分樓層作為議員臨時辦公室，然而議員助理並非如議員一樣享有獨立房間，而須於公共區域工作。儘管立法會大樓亦增設場所供使用中信辦公室嘅議員預約，開會期間作臨時辦公或會客之用。但狄志遠就關注議助於開放空間工作，保密方面會出問題，強調不能接受。至於擔心政府將削減社福機構整筆過撥款嘅狄，將來約見前黨友、勞工及福利局局長羅致光會否更易？狄就話對方已經係高官，「前黨友已不是價值」。

對於有議員不滿公共工作區域欠保密性，梁君彥就話該辦公室過去由國際級會計師事務所租用，認為過去可用，依家亦無問題，反問「佢哋（會計師樓）對私隱要求好低咩？」，強調呢度係政府租用最好嘅地方。

另外，有指梁君彥與候任議員參觀中信大廈辦公室時，提及喺該處工作嘅議員唔可以召開記者會及舉行請願活動。據悉，有關租約係由另一候任議員江玉歡所屬嘅律師事務所代表中信大廈處理。有候任議員就話知道有關安排係業主要求，原因係經過反對《逃犯條例》風波後，對方緊張大廈會否再被破壞，所以唔想涉公眾參與嘅事務喺辦公室內進行，佢認為呢個安排係人之常情。