政情：田北辰被話二五未嬲夠再寸周浩鼎帽子亂扣

黨友急急出手搭膊頭泯恩仇

建制派多次強調今次立法會選舉係君子之爭，互相指罵攻擊場面理應已成歷史。之不過，議員周浩鼎（Holden）就開咗個壞頭，早前喺選舉論壇上炮轟同一選區候選人、議員田北辰（田二少）「二五」而惹熱議。全體即20名地區直選嘅候任議員尋日一齊出嚟見傳媒，講到好似全部都係「自己友」咁，但係田二少喺發言時就毫不留情咁，當住全體直選議員面不點名嘲諷Holden，話有「自己人」為咗成為票王而亂「扣帽子」！搞到Holden嘅黨友一完記者會就要幫手撲火。

話說尋日喺記者會時都分享喺新制度下參選有咩感受，田二少甫發言時話，今次選舉最大得着係制度如何改變，人嘅本性都唔會變，又指今次選舉嘅良好意願係擇優非鬥劣。之但係就有所謂「自己人」，明知已手握鐵票可以高票當選，但為咗做「票王」而亂「扣帽子」、「玩泥漿摔角」等招數。佢呼籲當選嘅議員未來4年喺辯論議題時，唔應該咁對其他議員，切記要對事不對人，唔好點名及「扣帽子」，強調咁樣做絕對無助團結及監察政府。

陳穎欣食花生隔住口罩偷笑

田二少發言期間，Holden一眾黨友神情緊張，而坐喺旁邊嘅工聯會新界西南當選人陳穎欣就似乎喺度「食花生」，即使戴住口罩都見到佢露出笑意，更一度望向坐喺後排嘅Holden。記者會後，Holden亦都避唔過被追問事件，被問及對田二少嘅言論有咩回應時，佢就話過咗去嘅事就過咗去，希望大家聚焦向前看，並會爭取各議員支持推進工業發展議題。

記者會完結後，該黨主席走前搭田二少膊頭，而田二少亦伸手輕摟其腰，另一黨友陳恒鑌亦趨前拍下田二少膊頭，似係希望化解矛盾啊。事後問番田二少，係咪搭完膊頭後就化解恩怨？佢話Holden兩個黨友都係同佢講「算喇」，其實佢早就放低咗呢件事，尋日重提係想同其他89個同事講，以後做嘢謹記只係針對事，唔好針對人。

兩人「結怨」源於佢參加電台選舉論壇節目，過程中Holden突然情緒激動，批田二少關鍵時間做「二五仔」稱佢應改名做「田二五」等，當田二少反駁時佢更斥其「唔知醜」，可以話係今場選舉期間最受矚目嘅場面之一，雖然Holden有道歉，但田二少尋日就重提舊事，顯然係唔多收貨喇！