政情：白鴿黨內訌不絕 單仲偕逍遙滑雪

今次可以話係𠜎雞鬼祟離港後，首次喺Fb更新自己近況，佢更新封面相片為滑雪個人照，並喺貼文中話自己喺美國加州太浩湖天堂山滑雪，相中見佢笑到四萬咁口。唔單止有泛民前議員李國麟、莫乃光、梁繼昌同張超雄等人留言，亦見石禮謙留言話「You deserved the good times」（你應得的美好時光），𠜎雞就回覆其留言指「You too」（你都是）。亦有人指佢年紀都唔細，佢又回覆話都「六十有一」。其黨友黃碧雲、梁翊婷、李華明同埋油尖旺區議會前主席葉傲冬都有讚好貼文。

時為葵青區議會主席嘅𠜎雞喺判刑後，已喪失區議員職位，及後就被發現已辭去白鴿黨司庫及選舉委員會副主席等黨務。繼該黨副主席李永達幾個月前遠赴英國，其妻子陳樹英亦已抵達當地會合之後，至9月時就有指𠜎雞亦已離港，因為佢兩個兒子分別住喺美國東岸及西岸，礙於疫情未能見面，所以佢赴美只係為咗同家人團聚。至於幾時返港，當時就話起碼要一年半載之後先再作打算喇。

依家白鴿黨內訌不斷，早前因係咪參選立法會一事，黨內出現嚴重分歧，及後更爆出副主席梁翊婷及前中委蘇逸恒擅自撐同一候選人，黨內元老李華明亦以社工身份撐另一候選人，3人正受紀委會調查，相反𠜎雞一早辭去黨內職務去埋美國，睇嚟可以避開晒呢啲煩惱。