政情：傳統硬照原汁原味 蘇彰德至愛

隨住科技進步，佢話依家攝影入門嘅門檻較過去低咗好多，可以好經濟咁開創個人嘅攝影造詣，普通人只要手執一部智能手機就已經係攝影師喇！佢仲話喺日本，手機攝影已經去到一個相當成熟嘅階段，有啲職業攝影師只係用手機拍攝，然後藉互聯網交流或分享其作品。之不過，依家每日都有成千上萬嘅照片上載互聯網，網民到底會花幾多時間去欣賞網絡裏面嘅相呢？

佢引述一個統計，指互聯網上面嘅相，網民注目連一秒都唔夠！佢話喺網上睇相的確方便，但感覺上同實體攝影展覽仍有距離，因照片上載互聯網往往會經過壓縮，從而失去好多細節，傳統嘅硬照就冇咁嘅情況，況且硬照經過策展人嘅精心編排，其視覺效果亦都係網上睇相所難以比擬。佢又話攝影作為一種藝術，無論採取邊種形式，畫面要靚之餘亦需言之有物，方可成為經典作品。