政情：陳琬琛孖街坊播「老婆」錄音搵鸚鵡

話說早幾日有一位梨木樹嘅街坊，其飼養嘅3歲大雄性鸚鵡飛走咗，留低一隻雌性鸚鵡同6隻剛剛出世一個月嘅鸚鵡BB，希望佢可以幫手尋找，令呢個鸚鵡家庭一家團聚。雖然鸚鵡主人早有準備，利用鸚鵡係一夫一妻嘅習性，用手機播放家中雌鸚鵡嘅叫聲，然而過咗幾日都毫無蹤影，鸚鵡主人十分焦慮，擔心天氣轉涼，失蹤鸚鵡可能會捱唔住，然而大家都茫無頭緒，陳琬琛惟有透過自己嘅社交專頁，呼籲大家如果發現鸚鵡的話，立即通知佢或鸚鵡主人。

其後，鸚鵡主人鎖定梨木樹邨某幢樓宇，於是陳琬琛安排義工喺樓下播放雌鸚鵡叫聲，佢就同鸚鵡主人上樓，豎起耳仔逐層搜索，結果喺低層某單位聽到失蹤鸚鵡嘅回應！原來隻雄性鸚鵡「離家飛走」之後，闖入另一住戶單位並得到妥善照顧。該戶主見鸚鵡主人登門求「鸚」，好爽快將鸚鵡歸還原主，一家重逢。