政情：盲撐前黨友 楊彧被叮走

油尖旺前區議員陳嘉朗嘅社交專頁，尋日轉載一個網購平台嘅聲明，指由即日起，該平台同某清酒品牌終結與楊彧嘅一切合作，又話「有頭髮邊個想做楊彧？」今年7月，百多位區議員因擔心無法通過宣誓而辭職，楊彧同油尖旺前區議員蕭德健牽頭，聯同多位辭職區議員搞團購清酒生意，藉此賺取收入。當時楊彧向傳媒話，唔想見到辭職區議員為口奔馳而放棄社區，如果佢哋有收入的話，公民社會就唔會散得咁快。

團購平台嘅社交專頁就喺星期一（13日）上載楊彧同多位前區議員推介清酒嘅相片，但就喺同日，有傳楊彧將出現喺某候選人嘅入屋宣傳單張，楊彧回應話仍在考慮中，但過多幾日，楊彧就明言該位前黨友候選人對佢有恩，難以拒絕給予支持喎。結果佢嘅說話一出街，就有同路人唔滿意，有網民喺佢嘅社交專頁，鬧爆民協背棄民主、背叛港人！網購平台亦出聲明同楊彧割席。

建制陣營亦出現類似情況。雖說自由黨並冇規定，唔准黨員以個人身份支持候選人，而就算支持亦毋須向黨申請，日前自由黨先後有兩位榮譽主席以個人名義支持港島東某非建制候選人，做法引起黨內不滿。

自由黨尋日發聲明，指就今屆立法會選舉，該黨留意到有榮譽主席以個人身份簽署個人支持同意書，給予一名自由黨唔支持嘅地區直選候選人。該聲明強調有關榮譽主席嘅舉措屬個人行為，事前並未經黨團或常委會討論，更唔代表該黨立場。