政情：出獄兩年未自首潘太促陳同佳經深圳移台

下周二就係冬至，特別令人想到一家團聚。台灣殺人案受害人潘曉穎，慘遭毒手將近4年。痛失愛女嘅潘太，每逢佳節就難免想到，仍未為至親骨肉討回公道。尋日潘太就敦促當局，將案中疑犯陳同佳遣回出生地深圳，再由內地根據兩岸互助協議將陳移送台灣，同時又為導致香港劇變致歉。

曾聲言會到台灣自首嘅陳同佳，兩年前因洗黑錢案而刑滿出獄，繼而入住安全屋逾一年。兩個月前警方宣布停止為佢提供保護之後，就有傳陳棲身於偏遠深山。早前內地將一名槍擊案疑犯由福建遣返台灣，潘太建議港府參照相關做法，將陳遣回出生地深圳，再根據《海峽兩岸共同打擊犯罪及司法互助協議》，將陳移送往台灣受審。但接近陳同佳嘅人士回覆傳媒時指出，依家係台灣拒絕陳入境，與陳是否到內地無關。

指被利用向港人致歉

潘太又向所有香港人致歉，指過去這幾年目睹香港人因陳同佳案而受苦，一直好傷心、自責及愧疚，佢希望港人原諒佢作為母親急於為愛女討回公道，被人利用，導致香港政局急劇變化。