要聞港聞

笑看天下:有頭髮邊個想做瘌痢

香港人口老化嚴重,安老院舍供求失衡問題為人詬病多年,以2017至2021年為例,市民對資助護理安老院與護養院宿位嘅需求增加咗7,681個,係供應增加嘅13倍!勞福局局長羅致光稱,已將長遠嘅安老服務設施規劃比例寫入《香港規劃標準與準則》,同時喺4年間,將資助護理安老宿位嘅輪候時間由平均24個月減至近期嘅19個月,並指讓長者居家安老為終極目標。
羅局長說,政府會透過買位計劃增加資助宿位;之不過,追落後還有一大段距離。原本老朽想睇吓佢有乜大計多增加安老宿位,點知去到最後又係使出太極推手,認為最理想目標係「讓長者居家安老」!阿哥,呢個同扶貧無方,到頭來反認為長者因冇買公共年金又鬼咁長壽,所以未能保證生活質素一樣咁荒謬!
有頭髮邊個想做瘌痢?政府自1977年提倡「居家安老」,至今遠遠未能落實,皆因長者人口近年急速上升。根據統計數字,1997至2020年期間,香港65歲及以上長者人口激增109%至142萬人,其中多達78%嘅長者患有慢性疾病如高血壓、糖尿病、心臟病、癌症及中風等。政府推算,65歲及以上長者人口預計喺未來20年增加近一倍,到2039年會有252萬人,這情況將至少維持30年,可見安老服務確極具挑戰!日本人口老化比香港更嚴峻,不過日本以社區照顧取代住宿照顧,成為安老服務嘅核心,並獲分配更多資源。要言之,即係政府安老政策有承擔!
反觀香港,局長一味叫人居家安老,卻沒有增加資源,政策又短視,過去頻頻發現有獨居長者失救死亡。長者「孤獨死」都冇人知,仲講乜嘢「居家安老」?不如老老實實做好長者社區服務,並多建安老宿舍,咪成日諗住玩推手!
第一手消息請下載on.cc東網 iPhone/ iPad/ Android/
人人做記者
爆料方法 :
爆料熱線:
(852) 3600 3600
傳 真:
(852) 3600 8800
SMS:
(852) 6500 6500