昔日東方政情：幫人造勢違黨紀 梁翊婷話之你!
白鴿內訌 愈演愈烈
民主黨（白鴿黨）早前已否決以組織名義支持非建制派候選人，並只批准黨員李洪波以個人名義支持其中一名候選人。之但係，繼黨內元老、立法會前議員李華明前日唔理該黨決定，改用資深社工身份為候選人站台後，該黨副主席梁翊婷尋日更懶理紀律委員會調查，未有避嫌，現身佢支持嘅候選人造勢大會現場，仲話係喺附近行街所以過嚟打個卡喎。有中委對此大感不滿，怒轟梁作為領導層公然違反黨紀，反問既然個人立場同該黨有咁大分歧「點解唔退黨」？該黨主席羅健熙就話中委會將嚴肅跟進。
撐候選人辯稱行街經過
話說梁翊婷早前就缺席黨內特別會員大會會議，同日喺未經該黨同意下，就簽署文件確認以個人身份支持其中一名候選人，事件惹嚟黨友不滿，最終喺7名黨員投訴下，紀律委員會就事件展開調查。
之不過，作為副主席嘅梁就好似視黨規為無物，尋日就現身佢支持嘅非建制候選人造勢大會，仲話係自己行街經過喎。
對於梁近期經常做出挑戰黨規嘅行為，有中委就話既然該黨決定只批准李洪波嘅申請，梁作為領導層成員，今次現身造勢大會係公然違反黨紀。佢反問如梁認為自己立場比該黨紀重要，而該立場與黨有重大衝突時點解唔退黨，反而仲要「死攬」副主席嘅職銜做出違反該黨立場同黨紀嘅事情。
「民主黨出了一個叛徒」
民主派前區議員梁國豪都睇唔過眼，喺Facebook（Fb）貼文質疑梁「唔試吓咁岩（啱）行過去探下坐緊監果（嗰）D（啲）」，又嘲梁「若要人不知，唔好太低B」。其實梁都已經簽署文件表明以個人身份支持該名候選人，用行街做理由又好似難以令人信服喎。沙田前區議員趙柱幫亦喺Fb貼文話「民主黨出了一個叛徒」。
至於李華明未獲批准就擅自為非建制候選人撐場，又會唔會好似梁一樣被投訴呢？該黨紀委會副主席袁海文就話，暫時未收到有關投訴啦！
對於連續兩日有黨內資深成員同領導層唔按中委會嘅決定，為唔同嘅候選人站台，該黨主席羅健熙表示遺憾，又話黨員嘅紀律事宜均會按黨內既定機制處理；至於涉及副主席嘅個案，中委會早前已向副主席查詢支持同意書事宜，未有任何回覆。佢又指梁嘅行為同言論，已令黨友嚴重質疑其誠信，中委會將嚴肅跟進。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
