政情：做說客保育古蹟 蘇彰德：極具挑戰

蘇彰德早前喺一個訪談節目中提到，香港地少人多，對好多人或家庭而言，佢哋持有嘅物業已經係最重要同最有價值嘅資產。某建築物一旦被視為保育對象，有機會影響到唔同持份者嘅計劃甚至其經濟利益。蘇話就算一個家庭裏面，各個成員都有唔同嘅意見，更何況古蹟樓宇可能唔止牽涉一個業權人，相關業主亦未必全數都喺香港。要令到有關持份者都同意進行一個保育方案，真係要畀啲時間。

雖然要平衡各方持份者極具挑戰，但蘇仍希望將來會有更多業主同意保留城中重要嘅歷史建築物，畢竟近呢幾年，港人尤其是年輕一輩，對保育非常之關心，會到處搜羅相關資料然後提供畀古諮會參考。蘇話香港歷史建築同社會財產往後嘅命運，以及將來嘅城巿面貌，並非單純取決於古諮會，而係全港巿民嘅事。