昔日東方政情：還押譚得志憂快食「皇家飯」
儘管身陷囹圄，但還押人士較在囚者多享一項食「私飯」嘅權利。被控發表煽動文字、喺公眾地方作出擾亂秩序行為及參與民主派「35+」初選，涉違《港區國安法》等控罪而遭關押嘅人民力量副主席譚得志（快必），不知不覺咁就食咗「私飯」16個月嘞。雖然佢嫌茶餐廳供應嘅「私飯」食得多，有機會導致身體出現「三高」，但一想起遲下可能轉食「皇家飯」，就不禁悲從中來啦。
呻監獄冇最低工資
尋日快必嘅社交專頁交代佢嘅獄中近況，細數佢享用嘅「私飯」菜式，話朝早嘅素早餐係番茄假蟹柳野菌烏冬，仲有個菠蘿油添；晚上則享用黑椒德國鹹豬手，再加冇酒精嘅啤酒，聽落都幾豐富，但快必話可惜私飯送到畀佢已經攤凍咗，惟有自我安慰，話熱食有機會患上食道癌啦，跟住佢又話唔好羨慕喎，因為相信好快就要改食「皇家飯」，即係被判罪成，正式踏入在囚生涯。
快必又慨嘆，監獄並冇最低工資呢回事，話快手快腳咁用一個鐘去黐100個信封，都只得14蚊報酬。而佢就將累積二千幾蚊嘅收入，用嚟購買洗頭水、薯片同夾心餅等零食。佢話聽聞呢啲商品遲下要加價，真係愈窮愈見鬼咁話。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
