政情：導遊試題冷僻 陳智遠嘆浪費青春

陳智遠話「香港知識測驗」有40條選擇題，然而試題之冷僻，隨時令人倒抽一口涼氣！譬如問中環灣仔繞道有幾長？香港有幾多條行車隧道？香港有幾多個島？陳又話選擇題雖然係5個答案擇其一，然而所列嘅答案選項隨時會中伏，例如答案選項「香港100越野賽」，就會加一個「香港1000越野賽」嘅選項嚟陰你。

陳直言呢啲試題所涉及嘅大部分「知識」，導遊帶「劏客團」的話可謂無用武之地；若果帶文化深度遊嘅旅行團，亦無此必要，至於一啲有關實務嘅資訊，只要上網搜尋就得，根本毋須記住。

但無論點都好，為求過關續證，惟有貢獻30分鐘嘅人生參與考試，又話今次嘅感覺就好似回到中一測驗咁喎。