政情：無視批評參與峰會 羅冠聰貓哭老鼠

發言期間佢重提其立法會議席被褫奪，以及被判監，國安法落實後自己被冠上「分裂國家」嘅罪名，列於通緝名單從而流亡英國。又提及自己大部分喺香港合作嘅民主派友好，如黃之鋒、戴耀廷及黎智英等，目前都被判囚並面對審訊，又指民主退潮並非抽象理論，而係切身痛苦嘅事情。

佢又指北京嘅打壓不單止香港，更包括維吾爾人、西藏及台灣，而國際金融市場至娛樂事業都遭到中國系統性嘅滲透，但自由世界缺乏防範嘅意志，又指民主面臨危機，自由危在旦夕，認為需強化分享共同價值國家之間嘅聯繫，改革跨國組織。又稱國際社會有好長一段時間擁抱中國崛起，卻冇建立制衡機制，所以政治家與公民社會領袖必須通力合作咁話。最後佢又以廣東話講出「我哋唔係因為見到希望先堅持，而係因為堅持先見到希望」。

港府發言人表示，美方舉行所謂「民主峰會」，借民主之名行破壞民主之實，霸道地將自身標準強加於其他國家，令人憤慨。就此國家外交部已多次表明立場。而羅冠聰尋晚嘅發言，更凸顯該所謂「峰會」嘅荒謬及毫無公信力。