政情：「湊夠學分」大學畢業鄒家成：沙紙得來不易

社運人士鄒家成因參與舊年民主派35+初選，涉違《港區國安法》被控串謀顛覆國家政權罪，遭還押一段時間後，喺6月獲保釋候訊。鄒由於參政而申請延學，後來被還押等，終未能完成護士實習，而花咗6年時間，佢以「湊夠學分」嘅形式，被校方安排以「通識學士學位」畢業。保釋出嚟5個月後，佢前晚（7日）參與大學畢業禮，仲坦言「原來沙紙真的來得不易。」

佢尋日喺社交平台貼文同上載佢嘅大學畢業照，本來喺都會大學修讀護理系嘅佢，回想讀大二嗰年首次包裹屍體時，腦海突然浮現父親逝世時嘅樣貌，令佢當刻抽泣得無法繼續；又記起同學準備實習試時重複每個步驟嘅怪誕情景，亦令佢回味無窮。

涉初選案獲保釋候訊

但喺2019年發生連串事件，令佢嘅生活出現很大變化，後來更因初選案而被捕，今年3月被還押赤柱監獄，期間有同學特意為佢隔牆申請畢業但失敗。

佢仲透露喺6月申請保釋，「戴上四方帽與母合照，乃是我向高院申請保釋的主因。」而前晚，佢喺母親同家人嘅見證下，穿上學士袍，走上台接過證書，終於大學畢業。