政情：推動科研講就積極 陳易希鬧政策乏力

陳易希話政府雖然推出好多硬件同埋基建，例如發展以科技為重心嘅北部都會區同埋河套區一帶，但講嚟講去，都未見軟件，即係人才培訓囉！起咁多基建，但無人才配套，咁又有咩用呢？陳指香港科技人才嚴重不足，淨係睇每年中學文憑考試（DSE）嘅應考人數年年下滑就知道啦，因為科技人才多數都係年輕人，若然年輕人唔願意入行，就會好難搞喇。

陳又話，有經驗、有競爭力嘅人才自然會有好多出路，佢身邊都有唔少青年科技人才選擇移民或者去海外工作，亦都顯示港府挽留人才，以至對人才嘅待遇不足，令人才流失加劇。

面對人才不足，陳話政府可以考慮引入外來人才，例如搵啲來自廣東省、識得講粵語嘅人才，咁樣溝通都會方便啲嘛。當然培育本地人才都唔可以忽略啦，陳建議政府應該加強資助大學生去科技公司實習。佢指出創新科技界講求實務經驗，但過去兩年因疫情關係，好多實習計劃都停咗，導致學生欠缺經驗，畢業後搵工都難咗。佢認為香港目前嘅疫情都算穩定，總唔可以因為抗疫而令到所有嘢停擺。

疫情衝擊唔少行業，打爛好多人嘅飯碗，陳認為可以趁呢個機會，鼓勵一啲受創較深嘅行業如航空業、旅遊業、美容業等嘅從業員，報讀有關創新科技嘅課程，幫佢哋轉型，同社會最新發展方向接軌，又能解決人才荒嘅問題。

另外，佢又批評政府政策往往後繼無力。就好似數年前推出嘅科技券咁，啱啱推出時當然力度會大啲啦，但過咗幾年後，唔知係政府嘅相應資金差唔多用晒，還是政策過咗氣，推廣力度大大降低。所以希望政府未來推動科技政策可以恒常化，保持推動力啊！