政情：還押睹紅蟹行天橋 譚凱邦O嘴

譚凱邦嘅社交專頁日前上載佢嘅獄中信，話由於監獄有外籍人士，日間活動室其中一部電視機會播放國際新聞，而早幾日有一則外國消息令佢印象深刻，指澳洲某地方政府鑑於每逢夏天，都會有數以百萬嘅紅蟹穿過繁忙公路往海岸繁殖，於是就起一條天橋供紅蟹過馬路。譚話喺電視上見到大批紅蟹乖乖咁行上天橋嘅景象，真係睇到「O晒嘴」，大讚此舉有智慧，對比香港嘅漁護署以撲殺手段嚟對付野豬，澳洲當局嘅做法係人與動物共存嘅良好示範。

譚又話本地新聞有太多嘅荒謬，睇完之後心理負擔唔少。反而國際新聞會較開懷，況且亦可保持自己嘅英語水平。講到呢度，譚就回想起自己中學時代，全靠兩年嘅「地獄式訓練」，英文先至突飛猛進，真係要多謝當年嘅英文科老師咁話。