政情：談教學生涯 何順文：處置犯錯學生最困難

何順文話一旦有學生犯錯，老師依規矩去作出舉報，令學生接受紀律聆訊同懲罰，咁嘅處理方法當然係好容易啦，之但係執教鞭者，係咪要畀犯錯學生一個機會，不作舉報或者採用其他方法呢？有時真係好難拿捏o架。何話曾經遇過一位犯上嚴重過錯嘅學生，於是佢就要求對方出去罰企10分鐘，之後返入嚟睇吓有乜嘢想向何透露。結果呢位同學罰企10分鐘之後，就將自己所犯嘅過錯向何和盤托出，而何亦相信對方已了解到自己嘅問題所在，從而網開一面。何話到底係採用勸導，還是懲罰，對於教師而言往往係一念之間。

何順文又指出一個現象，就係香港高等院校讀書嘅內地學生，平均質素較本地學生高。佢話兩地嘅學生的確係有其文化差異，而正因為咁，至會激發學生試圖與人相處、同聆聽不同意見。何話人生就係咁o架喇，人與人之間好多見解都不盡相同，所以要識得去尊重、聆聽、妥協，而呢個亦都係學習嘅一部分。