政情：問責班子表現曳 民望低處未算低

香港民意研究所喺上月29日至本月3日，以隨機抽樣電話訪問方式成功訪問咗1,001名香港居民。調查顯示，林鄭月娥嘅評分喺34.6分，有35%嘅受訪者畀佢0分，有66%受訪者反對佢出任特首。至於林鄭月娥嘅民望淨值為負45%，比半個月前顯著下跌咗9%。

至於13位問責局長嘅民望，只有3位局長嘅民望淨值錄得正數，分別喺公務員事務局局長聶德權、環境局局長黃錦星同保安局局長鄧炳強。而民望錄得顯著下跌嘅局長就有4位，包括運輸及房屋局局長陳帆，其支持率淨值為負9%、勞工及福利局局長羅致光嘅支持率淨值為負12%、食物及衞生局局長陳肇始嘅支持率淨值為負16%，教育局局長楊潤雄嘅支持率淨值為負31%，屬於排名包尾。對比約3個月前，全部局長嘅民望淨值均告下跌。

根據民研計劃嘅標準，林鄭月娥屬於「表現失敗」。稱得上「表現理想」或「表現成功」嘅官員一個都冇。羅致光、陳肇始、陳帆及楊潤雄等屬於「表現一般」。創新及科技局局長薛永恒、發展局局長黃偉綸、民政事務局局長徐英偉，財經事務及庫務局局長許正宇屬於「表現不彰」。

另外，調查仲顯示市民對5項核心社會指標嘅評分，由高至低分別係「安定」、「自由」、「繁榮」、「法治」同「民主」，得分分別喺5.03、4.82、4.77、4.59和3.94分，當中「安定」、「自由」和「繁榮」指標相比一個月前錄得顯著跌幅。

浸會大學政治及國際關係學系副教授陳家洛直言，如果官員繼續漠視民意，只會令民情反彈，而部分局長評分下跌，例如羅致光咁，相信係同最近公布嘅貧窮數字同埋佢解說能力出現落差有關。陳家洛又指政府問責團隊嘅資歷同能力未有掛鈎，欠缺公眾認受。對於5個核心社會指標指數都下跌，陳就話唔驚訝，覺得香港依家似乎存在兩個平行時空。