政情：梁啟智Fb貼文 自爆任臺大訪問學人

梁喺Fb貼出一張台灣嘅街景相，指未來一段日子會喺臺大擔任訪問學人，並已經答應咗台灣嘅不同院校，分享佢所知嘅香港研究同埋故事。佢話自己第一次踏足台灣已經係20年前喇，當年朋友帶咗佢去十三行博物館，仲搭船去咗淡水。佢記得喺路邊一家好普通嘅舖頭隨便買咗杯酸梅湯，但竟然好飲到不得了，所以「自此喜歡了這片土地」。

不過事隔多年，今次仲要面對疫情，梁話點都要先喺防疫旅館隔離，仲要食咗好多日旅館嘅便當，不過佢話好彩唔係每日都有自己唔鍾意食嘅三色豆啫！佢又話，旅館後面剛好係一所學校，佢可以睇到校舍、操場，仲有旗杆。最後仲話自己專登上網搜尋一下到底當年飲嘅係邊家嘅酸梅湯，睇嚟佢真係好念念不忘喎，唔知佢最後會喺台灣留幾耐，定係一去不返喇。