政情：兩小飛魚鬥志昂 首挑戰橫越維港

「飛躍新世界」下的「小飛魚」計劃由新世界發展有限公司舉辦，主要為基層兒童提供免費專業培訓，為香港培育有潛質嘅運動員。兩名中三學生李港飛及葉偉發，均喺8歲時就參與有關計劃，開始學習游泳，至今已參與過無數嘅比賽，其中港飛已奪過學界冠軍。

不過，原來港飛約5歲時，曾因遇溺昏迷，但佢並冇被嚇怕，更報名參加泳班克服恐懼。透過努力練習，今年嘅學界比賽背泳50米奪得冠軍，一雪前恥。而游泳運動員何詩蓓為佢人生導師，港飛指，詩蓓喺游泳及學業均有出色表現，明白要做到兩者平衡，需要犧牲玩樂時間，更指自己嘅目標係要成為全職運動員及奧運冠軍。

葉偉發則形容，學游泳前身形「又肥又矮」，但習泳後開始長高減磅。佢表示，多年來不少朋友已經冇游泳，甚或離港升學，令佢感到孤單，因此需要靠自己堅持及身邊人鼓勵。今年首度挑戰維港泳，偉發提醒自己唔好太緊張，起步時游快一啲，以免被其他參加者阻礙及打亂節奏。