政情：「球王」梁栢賢 蒲頭練乒乓

以前PY都會喺Facebook（Fb）貼文，講吓對疫情嘅睇法，但係近幾個月就似乎絕迹Fb，唔知佢近況點呢？尋日見到佢貼文，佢都話有舊同事問起佢近況點？到底佢近排忙啲乜嘢？佢話最近醉心學習乒乓波，仲已經成功由直板轉打橫板，又重遇前校隊冠軍級校友，經校友指導下，又有少少進步喎。

喺社交平台再次蒲頭，有眼利嘅網友就話佢清減咗，亦有網友講笑咁話「打直板就看出年齡」，有網友乘機約佢打番場乒乓波添！佢唔單止精於網球、壁球、羽毛球，仲記得佢離開醫管局嘅時候，攞住一袋波，其實佢足球同籃球都掂，可謂「球王」呀！

PY喺2019年7月底離開醫管局後，同太太周圍去遊山玩水，享受人生，後來有見疫情來襲，經常喺Fb呼籲市民要留意嘅事項，亦曾批評有啲專家對疫情評論出現混亂，其後佢更「出山」，擔任新冠疫苗接種計劃專責工作小組專家成員。