政情：還押岑敖暉迷惘 不知我是誰

岑形容自己呢幾個月除咗最親密嘅人，幾乎陷入失語嘅狀態，有朋友問佢「為何咁耐唔出嘢（文）？」佢就話「我連自己是誰都確定不了，怎寫」，最近亦有唔知點樣走落去嘅念頭。岑又連續反問自己對「我」嘅理解，究竟「我」係由咩構成，「我」其實係咩以及「我」應該點理解「自己」嘅存在。喺搵答案嘅同時，岑就形容監獄嘅生活無「逃躲空間」，除咗赤裸裸面對自己之外，就無其他方法，而所謂嘅「尋找」自我，就係處身「沼澤」，愈想掙扎愈往下沉。

但呢種頹敝嘅情況，突然畀一首歌改變咗。岑話起初對呢首歌無太大感覺，但有一日瞓喺床聽收音機，電台突然播放嗰首歌，岑形容自己嗰刻感受「極度震撼」，好似有注好強嘅光束，打開咗佢封閉嘅內心，將「黑暗、混亂、痛苦及迷惘」都一掃而空，佢仲當場喊埋。自此之後，佢每一次聽呢首歌都會「頭皮發麻」，仲體會到只要有愛嘅存在，就有向前走嘅可能。

岑敖暉仲分享佢對老婆嘅感受，講到每次播呢首歌嗰時，佢老婆就從佢心中嘅「影像」，化做一個包圍佢嘅「保護膜」，透過大氣電波將愛傳畀佢。雖然係有啲肉麻，但佢自己都忍唔住，仲形容佢老婆都係處身掙扎同泥濘當中。

經歷咗接近一年嘅鐵窗生涯，岑敖暉承認曾閃出氣餒嘅念頭，甚至質疑自己係唔係「做咗Condom」。但估唔到一首歌嘅力量咁大，令佢覺得依家就算好難捱，但只要吸一口氣，總有路可走下去咁話。至於岑涉及嘅民主派35+初選交付往高院程序未完成，需押後至明年處理，期間仍需還押。