政情：殘奧奪牌圓夢 劉慧茵冀薪火相傳

劉慧茵分享時話2005年開始運動，曾接觸兩個運動項目，但因體能限制最後選擇硬地滾球。佢話幾年前開始轉為全職運動員，先發現該項運動嘅難度，加上教練同個人要求增加，無形之中為自己加添唔少壓力，幸好得到教練同朋友支持，令問題逐一解決。

咁做咗運動員後有咩困難要克服呢？佢話轉為全職運動員後，因為訓練時數增加，最擔心體能難以應付。但運動同時都為佢帶嚟方向同目標，做嘢更起勁，加上認識唔同朋友，做人處事都更成熟。

第4次參加殘奧嘅劉終取得第一個獎牌，佢好感激教練陪伴，雖然過程好艱難，但最終達成目標，坦言鬆咗一口氣，無辜負其他人期望。佢又強調比賽時唔好太看重成敗得失，最重要係享受過程啊！

港隊代表之一、曾喺2016年里約殘奧會奪金嘅飛魚鄧韋樂亦有同場，佢話最深刻嘅比賽都係喺里約奧運取得金牌，笑指當時比賽後非常疲倦，連勝出取得金牌都唔知，睇到電視屏幕上宣布其勝出，雖然心中好開心但亦未及反應。東京殘奧已完滿落幕，佢話未來目標係繼續一步步突破自己，練好泳式，鍛煉自己做得更好。