要聞港聞

笑看天下:唔打針只能做孤獨老人

正當內地專家表示「香港已具備通關條件」,「港康碼」料下月初推出,大家雀躍「關山」不再難越之際,失驚無神,竟然從非洲又殺出個新變種病毒株「B.1.1.529」,呢隻嘢據稱惡過肆虐全球嘅Delta變種,世衞標註其為「值得關注的變種」,並按希臘字母命名為Omicron。阿哥,病毒久不久又變一變,「觀病毒學新詞」都有排忙吖!
面對非洲變種病毒來勢兇猛,全球多國已相繼禁止非洲多國航班入境。香港冇嘢快,只有一樣快到撳唔住,就係病毒入侵特別快!呢隻非洲變種病毒惡菌,香港係「亞洲最快」確診!庸官反應遲鈍下,終於喺日前凌晨起禁止於21天內曾逗留博茨瓦納、伊斯瓦蒂尼、萊索托、馬拉維、莫桑比克、納米比亞及津巴布韋旅客嘅登機及檢疫要求,連同南非,即合共8個非洲國家或地區被禁。香港居民則須已完成疫苗接種,方可登機來港,並於抵港後於檢疫酒店接受21日強制檢疫。
政府專家顧問都指變種病毒Delta已令疫苗大打折扣,Omicron嘅基因突變更多達32個,前所未有;世衞都憂慮呢隻嘢有機會削弱疫苗保護力。依家香港有兩宗輸入個案,令人不禁納悶:會否因新變種非洲病毒而帶出新的通關顧忌?依家專家相信「只要變種病毒未流入社區,造成爆發,便不會影響中港通關」;老朽求神拜佛都係咁希望。
之不過,有陣時唔怕一萬,最怕萬一,目前對相關機組人員仍屬豁免檢疫人士,港府唔做好閉環管理,卻一味盲目谷針,有消息指政府正研究擴大「疫苗氣泡」至所有食肆和處所。若然,長者唔打針,即係連飲茶、睇戲都No way!唉!都話「壽則多辱」,果不其然,香港高官又多一樣叻:就係炮製「孤獨老人」!老朽肯定係受害者!
第一手消息請下載on.cc東網 iPhone/ iPad/ Android/
人人做記者
爆料方法 :
爆料熱線:
(852) 3600 3600
傳 真:
(852) 3600 8800
SMS:
(852) 6500 6500