昔日東方政情：侍應賣口乖 陳沛然自詡食力派
醫生除咗按專業分科之外，原來都有「食力派」同「偶像派」之分？醫學界議員陳沛然就以前者自居喎。點解咁講？話說陳沛然日前喺太子某點心店食晚飯，侍應姐姐問佢「你係咪靚仔醫生？」聽到恭維說話嘅陳沛然，好謙虛咁同對方講「我係醫生，不過唔係靚仔。我走食力派路線，唔係偶像派。」
幫襯點心店後大寫食評
之不過，陳沛然所講嘅「食力派」，唔單止係講醫術，仲可能係指佢寫食評嘅文字功力。事關較早前陳沛然踢完波之後，喺太子一帶嘅街頭搵嘢食，結果就幫襯旺角警署附近一間點心店，無意之下點咗小籠包，一嘗之下覺得味道唔錯，大有上海店嘅水準，至於其他點心亦食出驚喜，跟住佢喺Facebook留言話自己喺某點心店用膳。雖然無開店名，但留言區裏面竟然有網友估中咗，於是陳沛然驚呼「有無搞錯呀，咁都估到？」
正所謂食過翻尋味，陳沛然一再回頭幫襯，侍應姐姐當然會賣口乖啦！有寫開網誌習慣嘅陳沛然，就將佢喺呢間食肆品嘗過嘅食品逐一點評，當中既有讚，亦有彈，簡單扼要嘅描述，單睇文字就令人感受到箇中滋味。唔知陳沛然卸任議員之後，會唔會試下做美食評論家呢？
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
