政情：盧寵茂呻封關阻團聚 「幾個月先見一次孫女」

盧寵茂接受傳媒訪問時提到，中港因疫情關係，封關接近兩年，為確保醫院嘅營運，港大派出約30至40名員工常駐喺深圳，返香港見家人嘅機會並唔多。盧話每當佢人在深圳，都不時期望返港探望小孫女，但礙於未能通關，要隔幾個月先至返港一次，依家小孫女已屆一歲，盧話每次見佢都同上次唔一樣，變得好快。所以盧對通關非常期待，亦希望香港做到對接內地嘅標準，做好疫情防控。

講起香港大學同深圳市政府合辦嘅港深醫院，雖然盧寵茂多年來投放唔少心血，但為期10年嘅合約喺今年7月屆滿後，新合約只係延長多5個月至今年底。盧話10年前嘅協議已不適用，惟重新商討期間遇上阻滯及「小風波」，包括涉及新冠疫情、人事變動及行政延誤等，坦承情況唔理想。但盧強調目前醫院嘅運作無問題，財政健康，且醫院營運10年間取得唔少成就，今年更被納入為全國首批12家「高質量發展試點建設」嘅公立醫院，形容係進身「國家隊」，因此盧有信心最終能成功續約咁話。