政情：「貢獻」3次10號波 岑智明獲師弟鼓掌

岑智明日前喺社交平台貼文，話應母校邀請喺早會分享佢13年做「羅記仔」嘅點滴、天文台經歷、人生抉擇同終身學習等，期間仲講到「變幻才是永恒」。究竟係講打風路徑抑或人生？佢就冇多講嘞，但佢就話原來班師弟最有Feel係，當佢講到喺天文台長達9年嘅台長任期嘅一個「貢獻」，係乜嘢？就係掛咗3次10號風球，當時全場鼓掌，而兩場演講都完全一樣嘅反應添！

梗係喇！佢有個朵叫「吸風台長」呀！話說佢喺2011年接任天文台台長，2012年7月24日凌晨，因為強颱風「韋森特」襲港，天文台發出10號颶風信號；而喺2017年8月23日超強颱風「天鴿」亦掛10號波，2018年9月16日強颱風「山竹」都掛咗10號波。

舊地重遊，佢亦去咗母校嘅圖書館行咗個圈，仲同佢嘅至愛物理書《Feynman Lecture》合影。