昔日東方政情：還押譚得志 聽電台彈三彈四
聽收音機，係囚犯得知牆外消息嘅重要渠道，但對於被還押嘅人民力量副主席譚得志（快必）而言，喺獄中聽到唔啱口味嘅電台節目，可能更加難捱。
快必被控發表煽動文字、喺公眾地方作出擾亂秩序行為及參與民主派「35+」初選，涉違《港區國安法》等控罪而遭關押，曾做過播音員嘅佢喺社交專頁以「老妖節目」嚟形容香港電台嘅廣播節目。佢話監倉走廊嘅喇叭，晚晚定時定候8至10點同每朝6:30，一成不變咁播放港台嗰啲千年老妖節目，題材不時圍繞啲乜嘢懷緬呀、又話乜嘢紀念幾多年呀咁，內容咁老餅真係不堪入耳囉！快必又話港台已經今非昔比，佢呼籲嗰啲老妖節目嘅主持，應該要有啲反省能力咁話。
呻幾日都收唔到「精神食糧」
電台節目唔啱聽，惟有倚靠外界來信做精神食糧。但快必話唔知點解，近幾日都冇收到信喎，至於郵件延誤嘅原因，佢話不得而知，估計係可能還押嘅人多咗，收到嘅信件太多，懲教署職員都來不及處理喇！
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
