政情：辭任區議員 林德和考牌揸的士

日前林德和透過社交平台交代近況，同上載佢剛剛獲發嘅的士司機證嘅相片。佢話自小就對香港各區及街道有濃厚嘅興趣；即使自己家住南區，假日也經常前往元朗、屯門、上水等新界北地區遊覽。加上佢向來都覺得司機係一份有意義嘅工作，同埋想測試一下自己對香港街道嘅熟悉程度。而佢早前就順利通過考試，成為合資格嘅的士司機。

林德和話考的士牌毋須路試，只考筆試。而筆試就分3部分，涉及常識、路線同交通規則，全部都係選擇題，雖然同考車牌筆試差唔多，但要合格還須下一定工夫。之不過，筆試合格後須強制修讀16小時嘅職前訓練，過程就痛苦兼無聊喇！

林話依家經濟不景，人浮於事，尤其係原本駕駛旅遊巴嘅朋友，都紛紛考番個的士牌傍身，所以考試輪候時間都需要一個半月。

即使已經考獲的士司機資格，但林德和話希望對香港道路更熟悉，依家只係假日偶爾駕駛。至於教書嘅老本行，林就會兼職授課咁話。