昔日東方政情：建制小花植潔鈴 重返政壇
學堂訓練受傷 棄做督察休養
建制派嘅東區前區議員植潔鈴捨棄政途，早前投考警隊而退黨。數數手指，應該呢個月喺學堂畢業，但係就冇乜聲氣，原來佢已因訓練受傷而中途退出咗嘞！
2019年參選區會敗陣
植潔鈴回覆傳媒查詢時話，因為喺警察學堂訓練期間盆骨及腰受傷，已經喺9月辭職，並正申請重新入番建制政黨，又指自己已休養一段時間，目前需接受物理治療，但未決定傷愈後會唔會再投考警察。
其實，喺今年年初已有消息話佢「轉跑道」，退出政圈並轉行投考警務督察，當時仲透露植向來都對紀律部隊嘅工作有興趣，而佢喺2019年區議會選舉敗陣後，就萌生棄政轉投紀律部隊嘅念頭。
與游蕙禎惡鬥成熱話
唔單止因為植係建制「小花」受人注目，而佢曾經同因宣誓風波而被褫奪立法會議席嘅前議員游蕙禎惡鬥，最後要道歉一事，亦曾成為政圈熱話。
話說喺2019年6月中旬，游蕙禎喺網上踢爆，話佢嘅相片遭植潔鈴盜用，更公開埋對話錄音證植潔鈴認衰。事後兩女再度交鋒，植潔鈴拍片回應，解釋話玩通訊軟件Telegram唔用真名同真相係常識，揀相時好好彩揀中游蕙禎，重申自己唔知相中人係游而向佢道歉。
不過，話鋒一轉就笑住話游蕙禎已有一排無露面，暗寸佢潛水多時而唔認得佢，又話張相如網民所言，似某位男演員咁Man，說話真係句句有骨。
畀人踩到上面嘅游蕙禎亦喺Facebook作出反擊，話建制派淪落到要同本土派道歉真係陰功，仲話下次唔好咁話，更揶揄植潔鈴係「游區議員」添！
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
