政情：瞓極唔夠 孫明揚疑患睡眠窒息症

現年77歲嘅孫明揚喺報章撰文，稱早前有一段長時間，每晚睡眠都係斷斷續續，難以進入熟睡狀態，即使就寢良久，醒來仍然疲倦，導致精神委靡，影響日常生活。佢話起初不以為意，但後來意識到可能患上睡眠窒息症，於是搵醫生同佢做檢查同治療。而醫生就要求佢填寫睡量表，記錄打瞌睡情況，又邀請專門技術員到其住所進行睡眠測試。

而相關醫療報告顯示，佢嘅嗜睡情況嚴重，具有睡眠窒息症病徵，例如睡眠時多次出現呼吸暫停而引致窒息。報告又解釋，由於血液含氧量喺窒息期間降低而「扎醒」，醒後回復正常呼吸再次入睡，但入睡時再次呼吸中止而缺氧，因此又再醒來，而每次短暫窒息可維持數秒至一分鐘以上，而每晚則可發生十數次至數百次不等。

佢話現時就寢需佩戴睡眠呼吸機，但礙於觸及鼻孔嘅導管喺睡眠時不時移位，未能維持輸出固定氣壓，因此最初效果不佳。經過不斷調校呼吸機後，雖已掌握相關竅門，情況有所改善。不過，要達到一覺熟睡後，睜開眼睛迎來新一天嘅卑微要求，尚有一段距離。