昔日東方政情：港府表現曳 民調評分續尋底
本屆政府無論喺處理社會事件定係抗疫都屢被批評，市民對政府嘅評分自然都一路低迷，至今本屆任期亦都嚟到最後嘅大半年，但最新嘅民意調查發現，市民不滿政府表現嘅比率達56%，受訪者對民生狀況不滿率都有上升，高達55%，不滿經濟狀況亦佔51%。
香港民意研究所喺今個月15至18日以電話訪問咗1,004個市民，結果顯示有56%嘅受訪者唔滿意政府表現，較上月調查又再上升一個百分點，市民對政府嘅滿意率淨值為負30個百分點；而市民對政府嘅最新信任比率為42%，唔信任比率44%。
政治民生經濟 不滿率過半
至於市民對現時政治、經濟及民生狀況嘅評價，最新滿意淨值分別為負23、負24及負28個百分點，對民生狀況不滿率上升3個百分點，達到55%，而對經濟狀況不滿率就有51%，政治狀況不滿率都有52%。
另外，特首林鄭月娥嘅最新評分為37.4分，有33%受訪者畀林鄭月娥0分，反對率為60%，民望淨值為負36個百分點，就連評論員都話，相信林鄭見到自己一直都咁低分，都不禁汗顏啊！
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
