政情：不戰而敗泛民醜死怪

補選荃灣區會副主席內訌益建制邱錦平

經歷區議員離職潮同宣誓風波後，唔少區議會嘅正副主席都懸空，事隔一段時間，各區都似乎暫時「穩定」番，陸續補選咗正副主席嘅空缺。而尋日荃灣區議會都填補咗因李洪波被裁定宣誓無效，而造成嘅副主席空缺。外界原先預料係泛民建制之爭，喺兩邊都有4個區議員情況下，就算4比4打和，都可以抽籤博一鋪。點知泛民妥協失敗爆內訌，互不相讓下竟然棄選，令建制派嘅邱錦平成功「執雞」，邱話冇諗過會冇競爭，強調一直都有心做呢個位。

會議一開始，主席陳琬琛就表示只係收到建制派、屬於當然議員嘅邱錦平報名，宣布佢當選荃灣區議會副主席，全場隨即傳出一片掌聲。

至於被傳有意競逐副主席之位嘅公民黨前成員陸靈中，呢個時候就舉手發言，以為有咩想發表，但點知佢係關心新當選嘅副主席喎，話喺網上睇到邱嘅荃灣辦事處同鄉事委員會嘅電話地址一樣，擔心會唔會唔方便市民，仲話副主席之位任重而道遠，公眾對佢有期望。

陸靈中話問心無愧

陸喺完咗大會後，就解釋話每個人都有權選正副主席，自己盡咗力去達成共識。更發聲明承認想競逐該位，對於最終未能成功協調，只有說聲「無奈」，亦有心理準備接受大家對未能成功協調嘅批評。但陸就強調自己盡咗力尋求突破，問心無愧，冇半點後悔，亦都認為自己係適合嘅副主席人選，搵唔到退讓嘅理由。陸就話本身打算利用副主席嘅名義，名正言順咁協助無區議員選區嘅居民，可惜最終都事與願違。

黃家華一支箭咁走

而同樣被傳有意想做副主席、同樣係公民黨前成員嘅黃家華，喺大會結束後就頭也不回，一支箭咁離開，未有回覆提問，仲話「我架車泊喺下面，抄牌要$320，下晝開會先再講嘢。」

另有泛民議員就不滿結果，指自己特登早到協調，但唔知點解都係協調唔到，覺得唔應該就咁「扯白旗」，仲話4比4都有得博下，依家係鷸蚌相爭，漁人得利，要求佢哋同公眾交代。

對於成功喺區議會要職上拎番一席位，邱錦平就話自己冇諗過以咁嘅形式當選，稱自副主席空缺後一直有心想做，仲話都預計過可能會4打4等抽籤。

被問到有咩大計時，邱就話希望繼續做到城鄉結合，會繼續做同政府溝通嘅橋樑，亦都話會調整吓辦公時間方便市民。