昔日東方政情：港打造創科樞紐 李樂詩話資源唔夠
發展落後 人才出走
政府近年積極推廣科研，更想將香港打造成地區創科樞紐，但當局對科研出手似乎唔夠「闊綽」，科研發展長年落後於鄰近地區，更惹嚟極地女探險家李樂詩批評。佢直指政府喺科研投放嘅資源唔夠，要求提交嘅科研報告又繁複，本港亦都無合適嘅科研課程，搞到人才流失，成個科研環境都要「大執」。不過，佢都鼓勵年輕人要繼續努力，趁後生同有體能去追求科研夢！
作為全球第一位踏遍三極嘅女探險家李樂詩博士尋日獲社會企業研究院頒授榮譽院士，佢憶述自己20幾年前自費去考察，當時喺跟隨中國科學家嘅腳步，形容嗰時「做咗考察先再算」，等政府嘅資助已經太遲。佢仲話當時考察後發現氣候問題嚴重，見到雪崩都好驚心動魄，決心返香港同公眾發表相關資訊。
講起科研支援方面，佢就話中國政府依家喺科研發展上不遺餘力，因為中國需要預視到未來嘅發展，而外國亦都有設立科研基金；相反香港依家對科研資助仲有不足，佢透露只有慈善機構肯贊助學生去考察。佢仲話科研係一個持續過程，好多時要實地考察，而且唔係只係去一次，但每次問政府拎資助時都要寫報告，好多嘢要解釋，佢就唔係幾識寫喇！
佢又講到好多時學生去完考察想繼續進修，但礙於香港嘅出路比較窄，學生都只能選擇去外國讀。佢期望下一代繼續投身科研行業，同向政府爭取相關嘅資助，佢強調要做到科研科技探險3位一體，令年輕人有更多元嘅發展渠道，香港唔係得金融行業等發展路數。
至於曾喺殘奧六奪金牌，並5次打破世界紀錄嘅田徑運動員嘅「神奇小子」蘇樺偉，尋日亦獲頒資深院士。佢對於獲獎感到好自豪，又笑言近排以佢做原型嘅電影好賣得，希望用自己嘅經歷去鼓勵同感動香港人。
母嘆蘇樺偉冇退休金
蘇媽就話運動員喺黃金時間為港爭光，就算佢哋有無拎牌，都為咗香港付出好多，雖然政府對運動員嘅支援比以前好咗好多，但始終喺退役工作安排及退休金上都未有做好，指兒子「跑咗21年都無退休金」，又話兒子依家喺香港殘奧會工作，但「唔係個個好似佢咁幸運」，呼籲政府畀多啲資源運動員，尊重佢哋嘅付出同汗水。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
