昔日東方政情：未經許可掛橫額 李志宏遭申索$1629
政府上月終於完成全部區議員宣誓，唔少泛民主派被取消區議員資格（DQ），當中包括沙田區議會前主席李志宏。佢被DQ就嚟一個月，仍然搞唔同嘅活動，但成本就要自己承擔番啦。佢日前貼文話自費印有關活動橫額掛喺邨內，點知畀政府申索千六蚊，可以話係雪上加霜呀！認真黑仔喎。
淪「區已完」 自費交辦事處租金
佢日前喺Facebook貼文，話自費印橫額掛喺邨內，希望多啲街坊可以見到最近區內有乜嘢活動搞下，結果又被政府以《公眾衞生及市政條例》移走未經許可嘅橫額，向佢申索1,629元，佢都忍唔住反問「以前又唔見你出嚟得咁快？」又認為無論係唔係議員，都係服務緊市民，點解要畀政府咁對待。
其實被DQ後，所有費用都係佢自費，包括辦事處租金、電費同影印機費等，現時又開始畀政府追討早前向政府預支嘅營運開支，但佢指民政事務處拖欠數萬元辦事處營運開支就仲未還畀佢。雖然佢嘅辦事處會喺今個月底歸還房屋署，但歸還辦事處時所需嘅清拆費用同還原費用都係一筆錢，財政上只能勉強地維持。
佢又話單憑過去做地區事務嘅積蓄支撐維持未來嘅工作，加上佢有兩單案件在身，雖然仍未宣判，但預計須罰款同判監大約2至3個月，而依家佢需要每星期去警署報到一次，因此佢難以好似其他被DQ嘅區議員一樣，另覓一份全職工作，今次畀政府再索償千幾蚊，真係屋漏偏逢連夜雨喇！
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
