政情：曾健成獄中做「所長」 撞見AV仁瘦樣

曾健成話現時被安排喺車衣間工作，因為初來甫到擔任埋「所長」，負責清潔廁所。佢嘅倉友係一個20幾歲嘅後生仔，咁啱都係柴灣人，好彩人哋都有教佢工場同監獄嘅日常規矩，等佢避免犯規。

佢話依家喺赤柱監獄服刑，但就仲未收到每日嘅報紙、收音機、顏色筆同畫紙，淨係收過一封由律師寄嚟嘅信。不過，佢都話自己入獄後無食過煙，每日都有運動，希望喺呢半年嘅牢獄生活中，可以調理好身體咁話喎。

不過，坐監都有放風時間嘅，佢話曾經喺放風時見到其他因為上年民主派35+初選案被還押嘅前議員林卓廷、譚凱邦同埋朱凱廸等，但都只係打過招呼咁囉。佢又撞到AV仁，AV仁因前年8‧18、10‧1、10‧20，以及去年6‧4等4宗非法集結案，被控明知而參與及煽惑他人參與未經批准集結罪，共判囚18個月，兩人交談咗幾分鐘，話AV仁都瘦咗兩個碼喎。

其實AV仁都唔係第一次被人話瘦咗（口架）啦，佢自今年5月中入獄後，有朋友探佢時就發現佢嘅面龐明顯瘦削咗好多，佢都承認自己輕咗20磅，但就話都算適應咗，但嗰時仍有失眠問題。而佢喺6月頭由荔枝角收押所調到新嘅院所服刑後，就接受過「迎新」訓練，即係每日要喺洗衣房返幾個鐘工，負責摺疊及熨衣服，當中一早一晚各洗地半個鐘，要用力擦地，對於一個年近70歲嘅老人，曾動過兩次手術，又患過癌症，工作非常吃力，佢都話初期胃口欠佳，輾轉難眠，以致面容憔悴，而今個月初亦有人探過佢，形容佢精神唔錯。