政情：年逾半百搵工受歧視 林正財轟落後兼僵化

林正財早前喺一個訪談節目中提到，唔少機構仍然沿用過往幾十年嘅做法，以為市場上有好多勞動力，招聘員工好容易。其實香港正邁向人口老化，意味勞動力減少，所以必須設法令到僱員願意延長工作壽命，而唔係硬性規定年屆60歲就一定退休。況且60歲退休嘅觀念，會令到僱員50歲左右就開始面對年齡歧視，事關好多企業都會覺得，年逾半百嘅求職者，到底仲可以做得幾多年？所以呢個年齡層嘅打工仔一旦無咗份工呢，就好難重投職場。

林正財指呢種年齡歧視喺香港並唔適切，亦不合時宜。佢話好多先進國家，為「反年齡」歧視立法後，長者就業率即刻有改善，佢又認為政府若能發揮帶頭作用，以致其他企業都倣效就最理想，之不過企業跟唔上的話，政府就可能要考慮立法規管。