昔日東方政情：轉倉赤柱徐子見想望到天喎
因參與或發起去年民主派「35+」初選，涉違《港區國安法》，被控「串謀顛覆國家政權罪」嘅東區前區議員徐子見，早前由荔枝角收押所「過界」（轉倉）往赤柱監獄關押。雖然有人形容赤柱監獄嘅膳食屬「監獄界米芝蓮」，較荔枝角收押所好得多。之不過對徐子見而言，似乎唔多滿意新嘅在囚環境，指依家係望唔見天日喎。
同郭家麒做鄰居
點解咁慘？話說徐子見嘅前同事，同屬東區嘅前區議員韋少力上星期日探過佢。事後韋喺社交平台話，徐現時喺赤柱監獄獨立囚禁，加上佢所住嘅倉位於底層，所以係望唔到天。雖然環境改變咗，但徐都會去圖書館摷下有咩藏書啱睇，而佢最近就搵到本好啱自己口味但多年來都無人借過嘅書嚟細讀，由此可見徐嘅閱讀喜好係幾咁與眾不同喎。韋又話徐仍有食私飯同保持做運動，望落精神飽滿，又話徐隔籬嘅囚友就係郭家麒醫生，所以大家唔使擔心佢嘅健康。
去赤柱探完徐子見，同日韋少力又前往荔枝角收押所探望同案另一被告岑子杰。韋話岑嘅皮膚及頭髮都靚咗，之但係同囚嘅王百羽就瘦咗50磅喎，莫非荔枝角收押所嘅膳食真係咁難啃？
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
