政情：鍾錦麟在囚 獲邵家臻隔空賀壽

邵家臻以「睇得唔食得」嘅方式，喺網絡上載一張附有「Happy Birthday to Ben」字句嘅甜品相片，又話想親口同鍾講句「生日就算未至快樂也要盡量平安」。邵又提到早前探望鍾，話對方雖然對提訊一再延期已有心理準備，但仍感不快，畢竟還押將近一年。之不過，鍾嘅太太仍看似保持樂觀喎。

至於被控前年10‧20組織及參與未經批准集結罪嘅社民連主席黃浩銘，上個月亦喺獄中度過33歲生日。尋日黃嘅社交專頁公開佢嘅獄中信，指早前聽聞法官判佢監禁14個月，腦海隨即計算最早獲得釋放嘅日期，因為獄中行為良好的話，可獲懲教署扣減三分之一刑期，咁就趕得及太太生日之前出獄，可以同佢慶生咁話。睇嚟4度入獄嘅黃浩銘，對於坐監規矩真係瞭如指掌咁喎。