政情：與理大同慶生林大輝願望多

林大輝（左二）、滕錦光（右二）、理大行政副校長盧麗華（右一）及常務及學務副校長黃永德（左一）同慶生。

雖然1994年先至正名為大學，但由1937年官立高級工業學校成立算起，明年就係理工大學85周年校慶。喺尋日嘅傳媒午宴中，理大校董會主席林大輝，同埋理大校長滕錦光等人齊齊切蛋糕慶生，原來林大輝同理大嘅生日只係相差3日！林話理大校慶活動現正籌備中，想借助傳媒力量宣傳大計，例如整番個學校大門、向高空發展起多幾層整番個球場咁。

想學校高空發展起運動場

大家有所不知，理大原來冇正門，林大輝一早就喺校董會反映過，但聲稱當時「人微言輕」冇人理，依家做咗主席一提出就成事啦，預計明年喺理大噴水池位置整個新設計嘅地標式入口，畀師生「打卡」。佢又話，政府如果批准理大可以向高空發展就好啦，可以起運動場，唔使去浸大同人爭。

近日雖相繼有大學校長離任，但理大校長滕錦光就愈做愈起勁，希望明年85周年做得好好睇睇，未來會繼續推動創新創業教育，鼓勵學生參與科研。來港已經27年嘅滕校長，廣東話係大有進步，但理大校慶歌曲都係交畀其他人唱，話要等普通話版本佢先會跟住唱。

原來滕校長讀書嗰陣中文考第一，但後來就攻讀理科，仲做埋理大校長。喜歡寫詩嘅滕校長話結婚30周年會寫首詩送畀太太，將來退休願望係出版詩集，做番個文人。講起退休，滕校長話自己嘅姓氏算特別，係周文王後人，而內地就有個滕州市，將來退休就會去一趟。

第一手消息請下載on.cc東網 iPhone/ iPad/ Android/