要聞港聞

政情:麥潤培甫接掌區會 沙田民政專員即走

麥潤培 麥潤培
麥潤培
經過區議員離職潮同宣誓風波後,目前只剩9名區議員嘅沙田區議會尋日開會補選正、副主席,結果「馬鞍山守護線」成員麥潤培,以及民主黨成員冼卓嵐喺無競爭嘅情況下,分別接掌正、副主席。當選舉塵埃落定,列席嘅沙田民政事務專員柯家樂隨即離開。
麥盼署方放下成見
目睹柯家樂步出會議室,麥潤培話仍希望轉述民政事務總署,民主派人士只係想做好餘下兩年嘅區議會事務,且非常樂意同民政事務總署嘅同事合作,冀對方放下分歧與成見,唔好再同區議員「對着幹」,為沙田居民做實事。麥形容區議會現已伸出善意之手,若果民政署仍持抗拒態度,咁就唔係區議會嘅問題,佢亦無可奈何咁話。
麥又提到該區會只剩9名議員,因此有意重組委員會。不過佢強調重組後職能須同現時一致,不能有改變同刪減,促秘書處盡快提交研究文件,並預留時間和區議員面談。
本屆沙田區議會正、副主席,本來由民主黨程張迎、同埋沙田社區網絡黃學禮出任。但今年7月程以政局及健康為由請辭,其空缺由李志宏頂上,惟10月政府安排區議員宣誓時,李志宏和黃學禮均被裁定宣誓無效,喪失議員資格,導致區議會正副主席職位一度懸空。而該區現時只有9名區議員,當中7人為民主派,兩人為建制派,而兩名建制派議員林港坤同莫錦貴尋日均告假,缺席會議。
第一手消息請下載on.cc東網 iPhone/ iPad/ Android/
人人做記者
爆料方法 :
爆料熱線:
(852) 3600 3600
傳 真:
(852) 3600 8800
SMS:
(852) 6500 6500