昔日東方政情：網友一句生日快樂 陳樹英自爆喺英國
失蹤近4個月 忍唔住覆留言
喺違法佔領行動（佔中）案被判入獄8個月、緩刑兩年嘅民主黨（白鴿黨）副主席李永達（高達），同佢老婆、屯門區議會前主席陳樹英（Tree）早前前後腳離港。繼高達9月底喺社交平台靜雞雞「上水」後，佢老婆阿Tree「失蹤」近4個月後，因人家一句說話，尋日（18日）終於忍唔住「蒲頭」嘞，仲親自證實兩公婆喺英國生活。
話說高達喺今年8月初丟低老婆，獨自離港飛去倫敦。而相距個半月之後，即係9月中旬就傳出佢老婆阿Tree都飛咗去英國同佢會合，然而消息並未得到證實。而喺高達走咗之後，阿Tree完全絕迹社交平台，直至尋日先見佢蒲頭。
證與老公李永達一齊
點解會蒲頭？事關尋日係阿Tree牛一，有幾個網友喺佢嘅Facebook（Fb）專頁留言，祝佢生日快樂，甚至有網友猜測佢已經喺歐洲，仲問佢係咪同Mr.Lee（高達）一齊？而佢隔咗15分鐘到就回應話「謝謝！達和我在英生活安好！」事隔多個月，終於親自證實兩公婆身在英國。
話時話，英國同香港有時差，香港快英國8小時，睇番阿Tree嘅留言時間，應該係喺英國時間朝早8點鐘，即係一瞓醒就回覆網友嘞！高達走咗後，佢就「沉默」咗咁耐，勢估唔到竟然因為一句「生日快樂」就按捺不住嘞！
前後腳蒲頭刷存在感
其實，高達早喺9月底已經靜雞雞上水，而首次喺Fb上水就係白鴿黨召開特別會員大會之後，仲貼文有關冇表決參唔參選嘅消息，寫住「民主黨會大有共識」。當時已經令人質疑佢不甘寂寞，依家輪到佢老婆蒲頭，睇怕都係同高達一樣想刷存在感。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
