昔日東方政情：練拳避無可避 李予信被打歪鼻
雖然電影對白都有講「打還打，唔好打面」，之不過習武之人被擊中五官，有時都難以避免。東區前區議員李予信，今年9月辭職之後雖轉行做寵物美容，但仍然維持到拳館學打拳嘅習慣。日前佢喺社交專頁發文，話屈指一算，學習拳擊咁就一年嘞，而期間最難忘嘅事，就係試過練拳嘅時候被人打歪個鼻，擔心會破相咁話。
正視自己性格陰暗面
李予信憶述幾個月前同師兄弟嘗試對打練習，誰知就畀對方打中個鼻，需要入院做小手術。佢話受傷嗰一刻曾擔心會破相，但其後佢反而擔心練習對手太過自責，又話之後發現自己已經逐漸被拳擊改變。
到底有乜嘢改變呢？佢話拳擊練習嘅過程就好似一塊鏡，將自己嘅性格、心態、體格、抗壓力、待人處事方式等都如實反映出來，同時，亦不斷將自己多年來嘅壞習慣，以及做不同事情遇上樽頸嘅原因，統統表露無遺，令佢不得不正視自己過去經常逃避嘅弱點，以及自己性格嘅陰暗面。佢又話之後點都好，都要保持學習。腳功差，就要勤於練腳。
李予信對拳擊嘅興趣頗濃厚，除日前嘅貼文，早前亦不時喺社交專頁上載佢練習擊打吊球，同埋對住空氣打「擊影」嘅片段。
既然對拳擊咁熱衷，李予信又會唔會步沙田前區議員黎梓恩嘅後塵，報名參加拳腳比試，上擂台一較高下呢？
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
