要聞港聞

公營房屋起得慢 三年上樓似夢幻

「做人如果無夢想,同條鹹魚有咩分別?」呢句經典電影台詞,多年嚟向港人發出靈魂拷問。唔止港人,為咗唔做鹹魚,港府咁多年嚟都好有夢想,提出咗好多好宏大嘅目標,就好似承諾公屋「3年上樓」,令港人身處黑暗仍睇見曙光。之但係有夢想,但無能力實現,就算唔係鹹魚,但最多咪算金魚,叫一眾港人企喺度眼甘甘,有得睇無得食,市民想上樓,仲要發吓夢先。
運房局下調今年度起5年嘅公營房屋總建屋量預測,話主要係因為約3,100個其他資助出售單位嘅完工日期要延遲一個年度。公屋聯會總幹事招國偉提到,目前公布嘅公營房屋預測建屋量,查實已較《長遠房屋策略》嘅目標為低,其中2023/24年度的公營房屋單位落成量更跌至未來5年最低點,擔心公屋輪候時間仲會繼續創新高,甚至遠超政府承諾嘅一倍,達到6年。唉,中國人講求好事成雙,偏偏港府就喜歡壞事翻倍,坊間流傳「3年一個代溝」,家吓要等6年,唔怪之得市民同政府之間隔咗道鴻溝囉。
嗱!運房局解釋,每年建屋量基本取決於政府提供嘅土地供應量,同埋個別項目進度,而且項目最終落成日期會受到惡劣天氣、地盤限制、承建商進度等因素影響。一句到尾,即係起得慢啦。撇除土地供應問題,有地起樓都慢慢起,究竟等緊乜?查實工程項目進度慢、落成時間延期再延期,都唔係咩新鮮事;究竟係規劃太樂觀,前期準備不足,定係施工問題,詳情要公布先好喎。好比債仔想遲啲還錢,都畀個令人信服嘅理由。就係因為應承咗嘅事做唔到,港人對政府嘅信心先逐漸流失。
都係嗰句,無比較就無傷害。唔少港人成日仲以為內地好落後,偏偏喺民生工程上,無論當中幾多挑戰,遭遇多少困難,內地政府往往可以克服,按期完工,背後當然依賴日益先進嘅建築技術支持。本港貴為全球最發達地區之一,科技曾經處於世界前列,卻未有與時俱進,反而故步自封,近年嚟已經有唔少專家批評香港嘅建築技術落後於世界先進水平,起樓自然慢,兼夾問題多啦。
最怕係乜呢?完工時間延期啫,始終會起好,屆時公營房屋建成量就會增加,然後港府又畀呢個假象迷幻,繼續驕傲自滿、不思改進,本港房屋政策永遠原地踏步,結果市民安居樂業,就停留喺發夢階段。
擁有夢想其實好易,只要有欲望、有渴求,自然衍生夢想,但實現夢想往往非常困難。港府要一圓市民安居樂業夢,必須痛定思痛,唔好口噏噏當秘笈,今日本分未做好就「明日大嶼」。「明天會更好」唔係靠唱出嚟,而係靠港府實事求是,帶領港人一步一步前進,先可以實現得到。
第一手消息請下載on.cc東網 iPhone/ iPad/ Android/
人人做記者
爆料方法 :
爆料熱線:
(852) 3600 3600
傳 真:
(852) 3600 8800
SMS:
(852) 6500 6500