政情：地貧骨髓移植費高昂 基金盼政府恒常資助

根據估算，香港有12.5%人口有地中海貧血基因，即每8個港人就有一人係基因攜帶者。馬紹鈞話雖然無明顯病徵，但若夫婦二人都有地貧基因，仔女就有四分之一機會患上重型地中海貧血，又話重症患者要「斷尾」需接受骨髓移植，但手術費高達30萬元，又唔係政府恒常資助項目，一般家庭難以負擔。

而香港大學兒童及青少年科學系名譽臨床教授楊執庸都認為，依家香港地貧基因攜帶者可能更多，需要嘅資源亦相應增加，促政府提供協助。

該基金董事馬廖千睿上世紀70年代誕下長女後，曾3度懷孕但流產，經檢查後先發現夫婦都帶地中海貧血基因，雖然好難過，但佢最後都願意將胎兒遺體交畀醫生解剖，希望有助醫學發展。佢仲話3次流產後心情極度低落，幸好長女生性，又有家人支持，於是慢慢「重生」，學習花藝同烹飪等重拾心情。佢喺作品《重生》敍述咗自己嘅經驗，希望透過書籍，引起社會對地貧患者嘅關注，呼籲更多市民輸血同主動接受血液檢查。