政情：左手紮繃帶數月 陳肇始解脫

話說佢尋日出席一個活動，雖然身穿長袖衫，但拎咪講嘢嘅時候都唔難發現，佢左手嘅繃帶已經冇咗影喇！仲記得佢上次整親都係6月初接受議員質詢時，被人發現佢嘅左手紮上繃帶，隔咗約兩個月先親自解畫話因為辦公室廁所地下濕滑，所以一唔小心就跣親跌倒，但好彩傷勢唔算嚴重，並冇骨折。

事實上，佢都好容易受傷。例如喺前年3月出席一個公開活動，唔小心喺升降機入面跣親，有輕微骨裂，並觸及手腕舊患，需要送院治療。另一次就喺2015年10月，當時任食衞局副局長嘅佢喺健身時失平衡跌倒，右手虎口位舟骨骨裂，要用護腕固定右手，仲要接受為期6星期嘅治療。